من وحي الأدب والخيال
اقرأها مع… أحمديات
عامل من بنها… حكاية الطناش
من.. قطار زمان ..إلى ..قطار الحياة
في قاموس الأمثال الشعبية المصري تلاقي عبارات غريبة لكنها تحمل حكايات طريفة ومعاني أكبر من كلماتها
ومن أشهر العبارات اللي بنستخدمها كل يوم لما نطلب من حد حاجة ويعمل نفسه مش سامع أو يتجاهل الكلام وكأنه مش موجود نقول له ببساطة….إنت عامل من بنها؟!
لكن يا ترى إيه حكاية بنها وإيه علاقتها بالقطارات والكمسارية والركاب؟ تعالوا….
نرجع بالزمن شوية الحكاية بدأت في القطار
زمان أيام الإنجليز كان فيه قطار بيطلع من القاهرة متجهًا إلى الإسكندرية ويمر في طريقه على مدينة بنها…وبما إن بنها أول محطة بعد القاهرة فكانت تذكرة بنها أرخص من تذكرة الإسكندرية..وهنا ظهرت الفهلوة!
بعض الركاب كانوا يشترون تذكرة بنها رغم إنهم مسافرين للإسكندرية..يعني يدفع ثمن مشوار قصير ويستفيد برحلة طويلة!
وكانت الحيلة إن الراكب يفضل قاعد في مكانه لحد ما القطار يوصل بنها وينزل ركاب المحطة
وبعد ما القطار يتحرك تاني ويبدأ الكمساري جولته لمراجعة التذاكر كان الراكب يعمل نفسه نايم أو مشغول أو مش سامع..فيقرب منه الكمساري ويصحيه ويقول له….
اصحى يا أستاذ… إنت عامل من بنها؟!
وهكذا ارتبط المثل بالشخص اللي يتهرب من المواجهة ويعمل نفسه مش واخد باله علشان يفلت من المسؤولية أو يهرب من الحساب….
من القطار إلى قطار الحياة الغريب أن المثل لم ينته بانتهاء الرحلة ولا بتغير القطارات والسكك الحديدية بالعكس يبدو أننا طورنا الحكاية وفتحنا لها فروعًا جديدة ….والحكاية….
إن زمان كان الراكب يعمل نفسه نايم علشان يهرب من الكمساري وفرق التذكرة أما النهارده فالبعض أصبح يعمل من بنها علشان يهرب من السؤال والحساب والمسؤولية! تغير القطار وتغيرت المحطات لكن الفهلوة لسه هي هي
والفرق الوحيد إن زمان كان الكمساري بيصحي الراكب… إنما النهارده مين حيصحي الضمير؟!
أحمديات،،،،
إلى اللقاء فى حكاية جديدة مع مصريات،،،
