مصر تعتلي عرش القرار في المنطقة بأكملها مين كان يتخيل إن أزمة غزة، الصعبة دي، تدي مصر فرصة إنها ترجع تثبت دورها الدبلوماسي كزعيم للمنطقة
صحيفة “واشنطن بوست” الأمريكية طلعت بتقرير مهم أوي، بتقول فيه إن مصر، باستضافتها لمفاوضات شرم الشيخ، أكدت إن عندها نفوذ مايتعوضش
الصحيفة لخصت القصة في كام نقطة محدش غيرنا يمتلكها وأولها القرب الجغرافي، لأننا لازقين في إسرائيل وغزة.
تاني حاجة إننا عندنا علاقات قوية بقالها سنين مع كل الأطراف المتصارعة “المقاومة، إسرائيل، السلطة الفلسطينية، أمريكا”.
والكلام ده أكد عليه اللواء محمد إبراهيم الدويري “مسؤول مخابرات سابق” للصحيفة الأمريكية، وقال: “مفيش بلد تاني عنده كل العلاقات القوية دي”.
لما الهدنة كانت خلاص هتطير، اللواء حسن رشاد رئيس المخابرات اللي كان ماسك ملف المفاوضات، طار بسرعة لإسرائيل وقابل نتنياهو عشان يرجع الهدوء تاني.
منى يعقوبيان مديرة برنامج الشرق الأوسط في واشنطن، قالت: “قمة شرم الشيخ دي نصر كبير أوي لمصر، وهنستنى نشوف الدبلوماسية المصرية هتعمل إيه عشان الهدنة تستمر.”
التقرير أتكلم عن حاجة مهمة جدًا، وهو الموقف الثابت للرئيس عبد الفتاح السيسي: الحل الوحيد هو دولة فلسطينية مستقلة.
الرئيس السيسي قاوم اقتراح دونالد ترامب اللي كان عايز يحول غزة لـ “ريفييرا الشرق الأوسط” ويهجر أهلها
مصر حشدت الدعم العربي واقنعت الأمريكان بالخطة بتاعتنا اللي بتدعو لتشكيل لجنة فلسطينية تدير غزة بشكل مؤقت، وتدريب الشرطة الفلسطينية بإشراف مصري أردني.
حسين إبيش الباحث في معهد دول الخليج قالها صراحة: “مصر بتطبق اللي هي عايزاه على غزة، ولو عملية شرم الشيخ دي نجحت في إنهاء الصراع، مصر هتكون الدولة اللي ‘لا غنى عنها’ في المنطقة”.
التقرير ختم كلامه إن مصر بتلعب دور تهدئة في صراعات تانية مش غزة بس
القاهرة هي اللاعب الأساسي اللي بيحاول يتوسط لوقف الصراع بين الجيش والدعم السريع في السودان.
حتى في لبنان، رئيس المخابرات راح بيروت عشان يشارك في الجهود اللي منعت انهيار الهدنة الهشة بين إسرائيل وحزب الله.
خبراء كتير بيقولوا إن مصر بترجع لدورها كقوة إقليمية ضاربة بفضل دبلوماسيتها وخبرتها اللي اكتسبتها من سنين.
