“كافيه ملوك العرب”.. وكر صاخب بـ 36 شارع الحجاز المهندسين خمور ورقص ومخدرات بجوارعمارات سكنيه والسكان يصرخون: “أنقذونا”
بريد شكاوى الحقيقة نيوز
لم يعد النوم يعرف طريقه إلى سكان الحجاز – جزيرة ميت عقبة – حي العجوزة – المهندسين، بعدما تحوّل “كافيه ملوك العرب” إلى بؤرة صاخبة تعج بالخمور والممنوعات والرقص الصاخب، وكأنه ملهى ليلى مقنّع داخل منطقة سكنية هادئة.
المكان –بحسب الأهالى– يعمل بدون ترخيص، ويمارس أنشطة غير قانونية، تبدأ بتقديم الكحوليات والمخدرات، مرورًا بجلب فتيات “ركلام” لاستقطاب الزبائن، وصولًا إلى حفلات تستمر حتى الفجر، وسط حالة من الرعب والغضب بين الأسر المقيمة.
شهادات الجيران من قلب الشارع
أم محمد (إحدى الساكنات): “إحنا بقالنا شهور مش عارفين ننام.. الصوت بيرج العمارات المجاوره كلها، والموسيقى الصاخبة مش بتقف غير مع أذان الفجر.. حياتنا اتحولت لجحيم.”
مدرس بالمعاش يسكن فى نفس الشارع “الموضوع مش إزعاج بس.. ده خراب بيوت! عندى أحفاد صغيرين بيتربوا وسط منظر شباب سكرانين وبنات بترقص قدام العمارات. إزاى يحصل ده فى شارع محترم زى الحجاز؟”
شابة مقيمة بجوار المكان إحنا بنخاف ننزل أو حتى نعترض.. البلطجية اللى بيحموا المكان واقفين طول الليل، ولو حد اتكلم بيتعرض للتهديد.. إحنا بقينا عايشين مرعوبين.”
أحد الجيران من الشارع المقابل: “الكافيه مش بس بيدمر السكان اللى فوقيه.. إحنا كمان مش عارفين نعيش.. صف سيارات طول الليل، دوشة، اشتباكات أوقات بين الزباين.. ده مش شارع سكنى بقى، ده بقى سوق للانحراف.”
بلاغات بلا جدوى
السكان يؤكدون أنهم تقدموا بعشرات البلاغات للجهات المعنية، ورغم ذلك يستمر المكان فى نشاطه، وكأن القانون عاجز عن إغلاقه. “إحنا مش فاهمين.. هل لازم تحصل كارثة عشان حد يتحرك؟” يتساءل أحد الأهالى.
نداء عاجل للأمن
يطالب سكان 36 شارع الحجاز – جزيرة ميت عقبة – حي العجوزة برجاء اتخاذ قرار حاسم من مدير أمن الجيزة ومدير مباحث الجيزة وإغلاق “كافيه ملوك العرب” فورًا، حفاظًا على سمعة المنطقة، وحمايةً للأسر والأطفال من هذا الخطر الذى يهدد المجتمع يوميًا.
