عبر السيناريست محمد حجاب مؤلف حكاية «فلاش باك» أول حكايات مسلسل «ما تراه ليس كما يبدو» والتي حققت نجاح كبير مع عرضها عن سعادته بنجاح العمل وارتباط الجمهور به.
وأوضح حجاب في تصريح خاص لـ«بوابة أخبار اليوم» قائلا: «كتبت حكاية فلاش باك في 2022 والنجاح ده كرم ربنا عز وجل قبل كل شيء الحمد لله وبعده إخلاص كل الفريق اللي اشتغل سواء قدام الكاميرا أو وراء الكاميرا كمان» مضيفا: «الحمد لله احنا كلنا عملنا اللي علينا والتوفيق في الأول وفي الأخر ده بقى ربنا عز وجل».
وتابع قائلا: «والحمد لله إن العمل وصل للناس وإن الناس كانت متفاعلة معاه للمرحلة دي إن كل حلقة كانت الناس بتتوقع ايه اللي هيحصل في الحلقة اللي بعدها والنهاية كمان ايه والتركيز على كل تفاصيل العمل نفسه» واستكمل قائلا:«فكان فيه تركيز جدا من الناس الحمد لله على كل التفاصيل».
واختتم حديثه قائلا: «سعيد جدا وبحمد ربنا عز وجل وبشكر فضله طبعا قبل اي شيء ان هو يعني خلى الناس تتعلق بالحكاية بالطريقة دي».
محمد حجاب يوضح نهاية حكاية «فلاش باك»
وكانت الحلقة الأخيرة من حكاية «فلاش باك» قد أثارت حيرة الجمهور في تفسيرها الذي تصدر تفسيرها الحديث على السوشيال ميديا وأوضح محمد حجاب في تصريح خاص لـ «بوابة أخبار اليوم» تفسير النهاية قائلا: « النهاية مرسومة من البداية دي النهاية الصحيحة للأحداث في الاخر احنا بنتكلم على تواصل عبر الزمن وده بيحصل فيه تغيير في الخطوط الزمنية فكان لازم ينتج عنه النهاية دي».
وأضاف موضحا:«النهاية ببساطة أن نسخة مريم في 2018 في حد بيكلمها وبيقولها إنه في 2025 ومن المستقبل» واستكمل: «وبيقول لها أنا جوزك وأنا اعرف عنك كل حاجة وابهرها إنه عارف عنها أدق تفاصيلها وبعدين مرة واحدة اختفى تماما من حياتها فطبعا لما تمر نسخة مريم 2018 بالزمن وتوصل لسنة 2021 هي هتكون عارفة زياد لكن زياد في 2021 كان أول مرة يقابلها وهنا تبدأ بقى قصة تانية خالص بين نسخة مريم الجديدة باللي عاشته في 2018 وزياد بنسخته الجديدة في 2021».
تفاصيل حكاية «فلاش باك»
يذكر أن «فلاش باك» هي أولى حكايات مسلسل «ما تراه ليس كما يبدو» يتكون المسلسل من 30 حلقة ويضم 7 حكايات يتم عرض كل حكاية بشكل مستقل بأبطال جدد وقصة مختلفة في إطار 5 حلقات، من بطولة أحمد خالد صالح ومريم الجندي وخالد أنور من تأليف محمد حجاب وإخراج جمال خزيم.
